शिवाष्टक | By B R Nagina |
आदि अनादि अनंत अखंड, अभेद अखेद सुबेद बतावैं।
अलख अगोचर रूप महेस कौ, जोगि-जति-मुनि ध्यान न पावैं॥
आगम-निगम-पुरान सबै, इतिहास सदा जिनके गुन गावैं।
बड़भागी नर-नारि सोई, जो साम्ब-सदाशिव कौं नित ध्यावैं॥
सृजन सुपालन-लय-लीला हित, जो बिधि-हरि-हर रूप बनावैं।
एकहि आप बिचित्र अनेक, सुबेष बनाइ कैं लीला रचावैं॥
सुंदर सृष्टि सुपालन करि, जग पुनि बन काल जु खाय पचावैं।
बड़भागी नर-नारि सोई, जो साम्ब-सदाशिव कौं नित ध्यावैं॥
अगुन अनीह अनामय अज, अविकार सहज निज रूप धरावैं।
परम सुरम्य बसन-आभूषन, सजि मुनि-मोहन रूप करावैं॥
ललित ललाट बाल बिधु बिलसै, रतन-हार उर पै लहरावैं।
बड़भागी नर-नारि सोई, जो साम्ब-सदाशिव कौं नित ध्यावैं॥
अंग बिभूति रमाय मसानकी, बिषमय भुजगनि कौं लपटावैं।
नर-कपाल कर मुंडमाल गल, भालु-चरम सब अंग उढ़ावैं॥
घोर दिगंबर, लोचन तीन, भयानक देखि कैं सब थर्रावैं।
बड़भागी नर-नारि सोई, जो साम्ब-सदाशिव कौं नित ध्यावैं॥
सुनतहि दीनकी दीन पुकार, दयानिधि आप उबारन धावैं।
पहुँच तहाँ अविलंब सुदारून, मृत्युको मर्म बिदारि भगावैं॥
मुनि मृकंडु-सुतकी गाथा, सुचि अजहुँ बिग्यजन गाई सुनावैं।
बड़भागी नर-नारि सोई, जो साम्ब-सदाशिव कौं नित ध्यावैं॥
चाउर चारि जो फूल धतूरके, बेलके पात औ पानि चढ़ावैं।
गाल बजाय कै बोल जो, “हर हर महादेव” धुनि जोर लगावैं॥
तिनहिं महाफल देय सदासिव, सहजहि भुक्ति-मुक्ति सो पावैं।
बड़भागी नर-नारि सोई, जो साम्ब-सदाशिव कौं नित ध्यावैं॥
बिनसि दोष दुख दुरित दैन्य, दारिद्रय नित्य सुख-सांति मिलावैं।
आसुतोष हर पाप-ताप सब, निरमल बुद्धि-चित्त बकसावैं॥
असरन-सरन काटि भवबंधन, भव निज भवन भव्य बुलवावैं।
बड़भागी नर-नारि सोई, जो साम्ब-सदाशिव कौं नित ध्यावैं
औढरदानि, उदार अपार जु, नैकु-सी सेवा तें ढुरि जावैं।
दमन असांति, समन सब संकट, बिरद बिचार जनहि अपनावैं॥
ऐसे कृपालु कृपामय देव के, क्यों न सरन अबहीं चलि जावैं।
बड़भागी नर-नारि सोई, जो साम्ब-सदाशिव कौं नित ध्यावैं॥
Shivashtak | B R Nagina |
Aadi Anaadi Anant Akhand, Abhed Akhed Subed Bataavein.
Alakh Agochar Roop Mahes Kau, Jogi-Jati-Muni Dhyaan Na Paavein.
Aagam-Nigam-Puraan Sabai, Itihaas Sada Jinke Gun Gaavein.
Badbhaagi Nar-Naari Soi, Jo Saamb-Sadaashiv Kaun Nit Dhyaavein.
Srijan Supaalan-Lay-Leela Hit, Jo Bidhi-Hari-Har Roop Banaavein.
Ekahi Aap Bichitr Anek, Subesh Banaai Kain Leela Rachaavein.
Sundar Srishti Supaalan Kari, Jag Puni Ban Kaal Ju Khaay Pachaavein.
Badbhaagi Nar-Naari Soi, Jo Saamb-Sadaashiv Kaun Nit Dhyaavein.
Agun Aneeh Anaamay Aj, Avikaar Sahaj Nij Roop Dharaavein.
Param Suramya Basan-Aabhooshan, Saji Muni-Mohan Roop Karaavein.
Lalit Lalaat Baal Bidhu Bilasai, Ratan-Haar Ur Pai Lahraavein.
Badbhaagi Nar-Naari Soi, Jo Saamb-Sadaashiv Kaun Nit Dhyaavein.
Ang Bibhooti Ramaay Masaanki, Bishmay Bhujgani Kaun Laptaavein.
Nar-Kapaal Kar Mundmaal Gal, Bhaalu-Charam Sab Ang Udhaavein.
Ghor Digambar, Lochan Teen, Bhayaanak Dekhi Kain Sab Thar-Tharaavein.
Badbhaagi Nar-Naari Soi, Jo Saamb-Sadaashiv Kaun Nit Dhyaavein.
Sunatahi Deenki Deen Pukaar, Dayaanidhi Aap Ubaaran Dhaavein.
Pahunch Tahan Avilamb Sudaaroon, Mrityuko Marm Bidaar Bhagavein.
Muni Mrikandu-Sutki Gaatha, Suchi Ajahun Bigyajan Gaai Sunaavein.
Badbhaagi Nar-Naari Soi, Jo Saamb-Sadaashiv Kaun Nit Dhyaavein.
Chaaur Chaari Jo Phool Dhatoorke, Belke Paat Au Paani Chadhaavein.
Gaal Bajaay Kai Bol Jo, “Har Har Mahadev” Dhuni Jor Lagaavein.
Tinahin Mahaaphal Dey Sadaasiv, Sahajahi Bhukti-Mukti So Paavein.
Badbhaagi Nar-Naari Soi, Jo Saamb-Sadaashiv Kaun Nit Dhyaavein.
Binasi Dosh Dukh Durit Dainya, Daaridrya Nitya Sukh-Shaanti Milaavein.
Aashutosh Har Paap-Taap Sab, Nirmal Buddhi-Chitt Baksavein.
Asaran-Saran Kaati Bhavbandhan, Bhav Nij Bhavan Bhavya Bulaavein.
Badbhaagi Nar-Naari Soi, Jo Saamb-Sadaashiv Kaun Nit Dhyaavein.
Audaradaani, Udaar Apaar Ju, Naiku-Si Seva Ten Dhur Jaavein.
Daman Ashaanti, Saman Sab Sankat, Birad Bichaar Janahi Apnaavein.
Aise Kripalu Kripaamay Dev Ke, Kyon Na Saran Abahin Chali Jaavein.
Badbhaagi Nar-Naari Soi, Jo Saamb-Sadaashiv Kaun Nit Dhyaavein.
